Ua amata nei iloiloga a le malo e tauala mai i le Matāgaluega o A’oga i le ono taofia ai o fanau a’oga e i lalo atu o le 16 tausaga le matutua, mai le faaaogāina o upega tafa’ilagi o le social media.
O lenei matāupu na amata talanoaina mai ina ua faaulu atu e le sui faipule mai le National ia Catherine Wedd se pili taufaaofi e tapu ai fanau a’oga e i lalo o le 16 tausaga le matutua mai le faaaogāina o nei auala o fesoota’iga.
E faaopoopo iai, e tatau ona iai ni auala e mata’itūina ai tausaga o tupulaga e lesitala mo upega tafa’ilagi, ma ia iai foi ni faasalaga mo ē e lẽ mulimulita’ia ia aiaiga.
Ua i luma nei mo le faapalotaina o lenei pili, ae e lẽ o mautinoa le ono talanoaina ma le faia iai o ni fetufaa’iga a le Palemene.
Ua ta’ua i lipoti mai le Newstalkzb, e lē o talia e le vaega faaupufai a le ACT lenei fuafuaga.
O le latou vaai, o le a solia e le malo, aiātatau o le tagata, ma e iai lo latou talitonuga e iai lape o lenei fuafuaga.
Na faalia e le ta’ita’i o le malo ia Christopher Luxon, e to’atele lava mātua ua faaalia atu lo latou lagolagoina o lenei fuafuaga, ma o le a aga’i le malo e iloilo ma su’esu’e atili nisi o ta’iala faavaomalo o loo faaaogāina e Ausetalia, le Iuni o Europa ma le malo o Kanata.
Puna o Faamatalaga: https://www.newstalkzb.co.nz/news/politics/national-introduces-bill-to-ban-social-media-for-under-16s/
