O le amataga o lenei vaiaso fou ua amatalia ai talanoaga faavaomalo a ta’ita’i o Niu Sila ma Samoa e pei ona feiloai ai le afioga i le tamaitai Palemia o Niu Sila Jacinda Ardern ma le tamaitai Palemia o Samoa le afioga Fiame Naomi Mataafa.
O le Aso Lua 14 o Iuni e pei ona faailoa i se pepa o faamatalaga mai le Malo o Niu Sila, o le a amatalia ai ia feiloaiga ma talanoaga i le va o ta’ita’i o Malo e lua. O le 60 tausaga o le feagaiga faauo a Niu Sila ma Samoa o se tasi o mataupu o loo laualuga i talanoaga aemaise o le tausaga nei i le masina o Aokuso e atoa ai le onosefulu tausaga o lea feagaiga.
O le tuaa o le tamaitai Palemia o Samoa le afioga i le Tamaaiga Fiame Mataafa Faumuina Mulinuu II, o le uluai Palemia o Samoa na ia sainia le feagaiga ma ta’ita’i o le Malo o Niu Sila i le aso muamua o Aokuso o le tausaga e 1962. A o iai i Aotearoa le ta’ita’i o le Malo o Samoa i lana uluai asiasiga o le Palemia o le tatou atunuu, o le a feiloai atu o ia i nisi o le atunuu faapea foi se mafutaga ma sui faipule o le Palemene o Niu Sila e iai o latou piitaga o tagatānuu o atumotu o le Pasefika.
Ua fuafua foi o le a feiloa’i le afioga Fiame Naomi Mataafa ma nisi o tagata faigaluega faavaitaimi o loo galulue i Aotearoa.
