Ua amata nei sa’ili’iliga ma su’esu’ega a le Komisi o Pisinisi poo le Commerce Commission a Niu Sila, e faia faasaga lea i se kamupani i Kalaiesitete ua faaigoaina o le SFCVIBE Rating, ina ua oo atu i le komisi ni faaseā ma ni masalosaloga o lenei kamupani o loo faia ni faiga faasolitulafono ma le ta’ufaavalea e aafia ai tupe poo le vaega ua faaigoaina o le pyramid scheme.
I ripoti mai le NZ Herald, na faamauina ai o lenei kamupani 2 ona lālā e aofia ai ma Manukau, ma e tusa ai ma faamaumauga e latou te faaaogāina auala faatekonolosi ma le initaneti poo le online e faalauiloa ai a latou auaunaga, e faaali atu ai i le lautele e telē le tupe poo le seleni a le tagata e maua mai ai e pei ona iai se tasi o vaega, e telē le tupe e maua pe a saini e matamata i ni ata tifaga ma faatino ai sau iloiloga.
Faaalia e sui o auaunaga o leoleo ma isi, i le ono maua ai o le avanoa o le tagata e tatau ona fai o se subscription ma aumai i totonu nisi tagata i le auala lava e tasi faato’ā iloa lea ua maua sau seleni.
O foliga vaaia uma ia o faiga taufaavalea poo le pyramid scheme o loo lapata’ia ai le to’atele.
Ua lapata’ia ai e le faauluuluga o le Komisi, i le vaega o le Fair Trading, Simon Pope, tagatānuu uma ina ia faaeteete lo latou auai i ia ituaiga pisinisi, ma o le tele o faalapotopotoga faapea e faalauiloa le vave ona maua o tupe, e tele lava ina lē sa’o ma faamaoni le faatinoga ma le maua ai o ia seleni.
O loo iai le talitonuga a le Komisi ma auaunaga a leoleo, o loo faatino galuega a lenei kamupani i tulaga faavaomalo – o lona uiga e oo atu i atunuu i fafo atu o Niu Sila lea auaunaga e aofia ai ma Fiti o le Pasefika, lea ua lipotia mai le fautuaina malosi ai e le komiti faafoe – Consumer Council of Fiji ma le vaega o le National Anti-Scams Taskforce ona tagatānuu i ona aafiaga ma ua faailo ai foi ua faitau afe i latou ua matua’i aafia i faiga faasolitulafono nei ma e matuā tele aafiaga i seleni a tagata.
Ua faasolo sa’ili’iliga i tulaga moni o lenei kamupani, ona o loo faalauiloa o se kamupani faavaomalo ae māua faato’ā resitala lenei kamupani i totonu o Fiti i faaitu o Labasa i le tausaga lenei 2026.
Ua fautuaina e auaunaga a leoleo ma le Komisi o Pisinisi, tagata ina ia mataala ma ia ‘alofia le seetiagofie i le matagofia o le faailo mai o le tupe maua vave ma toe faamanatu o pisinisi aloa’ia e lē tau moomia fua le totogi o se seleni e maua ai tupe maua.
O loo faasolo su’esu’ega i lenei matāupu.
Puna o Faamatalaga: https://www.nzherald.co.nz/nz/christchurch-firm-sfcvibe-rating-probed-over-suspected-pyramid-scheme/RI3IKZYATBHTPLYCVMOFET74Y4/
