O alii taaalo o Roger Tuivasa Sheck poo RTS pei ona faapuupuu ai lona igoa, atoa ma Stephen Perofeta ua faamaonia nei o le a muamua i totonu mo le All Blacks i lana taaloga o le a sosoo ai ma Iapani.
O Tuivasa i le numera 12 ae o Perofeta i le fulupeki i se ‘au ua faalauiloa mai e le faiaoga o Ian Foster i le asō.
Fai mai le Herald e ono isi tama taaalo mai le taaloga talu ai ua faamalolo mo le taimi nei.
Fai mai le faiaoga o le malaga taamilo lea o se faamoemoe tele ma e 4 tests poo taaloga faitaulia tetele o loo aga atu iai ma e le taumate o le a tele foi ni fesili e fetaui ma latou e fua i le iuga o le taaloga lea ma Iapani.
Fai mai Foster latou te mananao e faailoa ua o latou sauni ma ua o latou faia le galuega manaomia e lifi ai i luga le taaloga ma e tele foi lo latou faaaloalogia o tama taaalo a Iapani.
O le taaloga e faia taeao i Tokyo i Iapani.
