O le maota tatalo o le malo i le mauga o Vaea na tatala ai le vaiaso o talosaga ma anapogi mo lenei tausaga fou i le sauniga lotu masani i le afiafi o le Aso Sa muamua o Ianuari 2025, lea sa ta’ita’ia e le afioga i le Akiepikopo Mosese Vitolio Tui o le faauluuluga o le puleaga a Samoa Apia o le Ekalesia Katoliko i lo tatou atunuu.
Ua atoa ai i le tausaga nei le 35 tausaga talu ona faatino e le malo lea polokalame e amata ai le kalena o sauniga faalemalo aemaise o galuega o le tausaga fou, i le faamoemoe e talosia le atunuu mai mala faalenatura e pei o afā, lologa, mafui’e, ma galulolo poo sunami.
O le tausaga e 1990 na amata ai le polokalame o le vaiaso o talosaga ma anapogi, e o faatasi ma le vaiaso o lotu o le tausaga.
O ta’ita’i o le malo e aofia ai le afioga i le Ao o le Malo ma lana Masiofo, o le Palemia ma Minisita o le Kapeneta sa auai i le sauniga ua tatala ai le vaiaso o talosaga ma anapogi o le tausaga 2025, lea o le a faai’uina i le Aso Faraile o le vaiaso nei.
