E tatau ona oo atu i le faaiuga o le Aso Sa nei ua manino mai le ‘au e tasi a tamaitai o le a faamautu lona avanoa i le tausinioga mo taaloga o le Olimipeka i le faaagatama o taaloga lakapi taitoafitu i le itupa o tamaitai mo le 2024 i le taamilosaga o loo faagasolo a le HSBC World Rugby.
O ‘au a tamaitai mai Aialani, Fiti ma Peretania e na o le tai fā togi loo va ai ae o loo tausinio mo le avanoa lea e tasi e avanoa mai mo le Olimipeka i le tausaga fou.
O ananafi na amata ai le isi vae o taaloga taitoafitu mo lenei tausaga lea o loo talimalo ai Toulouse i Farani ma o le ‘au o le a faamanuiaina i le avanoa lea e tasi o le a auai faatasi atu ma isi ‘au mai Niu Sila, Ausetalia, Amerika ma Farani i le faamoemoe lea i Paris.
O le taimi nei o loo sili Niu Sila i ‘au a tamaitai, tulaga lua Ausetalia, tulaga tolu o loo iai Amerika ma Farani i le tulaga fā a o tālia ai le iuga o le vae lea i Toulouse.
I le itupa o alii o loo sili ai foi Niu Sila, tulaga lua Argentina, tolu o iai Fiti ma Farani i le tulaga fā. O Samoa o loo i le tulaga ono.
O le uluai taaloga a Samoa i le itupa o alii na fetaui ai ma Aialani i le po anapo, lea na faia’ina ai i ‘ai e 12 i le 14 a Aialani.
O le Pulu D o loo iai Samoa faatasi ma Ausetalia, Aialani ma Iapani.
