E amata atu i le masina fou ona faamamalu siitaga o pasese mo auala o feoaiga lautele poo public transport i Niu Sa Uelese peitai fai mai le faigamalo a le setete o le a o latou faaitiitia le totogi o pasese i Aso Faraile e faapaleni ai le siitaga ua faalauiloa.
E amata faamamalu pasese fou ia i le aso 16 o Oketopa.
E fua i faamatalaga mai le faigamalo a le Setete, o le Aso Faraile lava ia i vaiaso taitasi o le a faataugofie ai pasese e le gata i trains, pasi ae faapea le light rail.
E manatu nisi e masani ona faaaogāina auala o feoaiga lautele, o se tala faanoanoa foi lenei ua faaopopo atu i le anoano o le mau luitau o feagai ai nei e le gata i le tau o le soifuaga, penisini, pili o aso taitasi, ae o lea ua toe fafa mai ai luga ma le siitia o totogi o pasese i auala o feoaiga lautele.
