Ua saoloto Queenstown mai le poloaiga o faalavelave faafuasei sa iai i le faaiuga o le vaiaso ua alu, ma o lea ua amata galuega faamamā.
O le mamafa o timuga lea na pa’ū i Queenstown i le Aso Tofi ma le Aso Faraile e faatusaina i le mamafa o timuga o le tasi le masina, ma e oo mai i le Aso Toonai ua mamā ma toe faalēaogāina ai loa le poloaiga.
Ua faamaonia mai e le pulenuu e 10 fale o Queenstown ua pipii ai le sticker lanu mūmū poo lea ua lē mafai ona toe nofoia ona ua lē saogalemu ma o lea foi ua faia ma le 28 aso transition period e toe tau faatulai ai tagata ua aafia aemaise le tele o meatotino ua faaleagaina e lologa.
E oo mai foi i le taeao nei o loo tatala pea fale ua faia faapitoa e sulufai atu iai tagata ua leai ni fale.
Ua toe tatala le tele o auala, ae e iai lava nisi o vaega o loo faaauau ona tapunia pea i le taimi nei.
A o pisi ai la Queenstown i galuega faamamā, e oo mai i le Aso Toonai ua 29 tagata ua faamaonia ua aafia ona o le lē mamā o le suavai maua i Queenstown, ma o loo faatumauina ai pea le faasilasilaga na aumai i le Aso Gafua talu ai e tatau ona faapuna muamua le suavai.
