O se moemitiga ua 40 tausaga o fuafua mai, ae o lea ua taatia nei i lona taatiaga mautinoa. O le tausaga talu ai i le masina o Oketopa na faamautinoa ai fuafuaga mo lenei matagaluega fou a le malo, ma sa tulai mai ai le tamaitai minisita o Carmel Sepuloni i le ta’ita’iga, peitai la o lenei ua tofia e avea ma minisita o lea matagaluega fou, le tamaitai o Poto Williams, lea na faasee ese talu ai nei mai le tofiga o le Minisita o Leoleo.
O se tala fiafia tele lenei mo i latou o loo iai mana’oga faapitoa poo mana’oga tumau (disabled people), ina ua faatulaga mai lava se matagaluega patino e taulimaina polokalame ma vaega uma auā le fesoasoani ma tausia lelei i latou o loo iai mana’oga tumau.
Saunoa le tamaitai minisita sa amata ta’ita’ia mai lenei faamoemoe, Hon Carmel Sepuloni, ‘O le mea muamua lava ia sologa lelei le faafoeina o fuafuaga uma ua faataatitia mo le matagaluega, ma ia sosolo ai lava i le tulaga lelei e pei ona amata mai ai le uluai aso.’
E iai foi le faamoemoe o le tamaitai minisita o lenei matagaluega fou, ina ia faamautinoa e laugatasia uma i latou o loo iai i totonu o le atunuu o ē iai mana’oga tumau, i faamanuiaga uma o le a taulai i ai galuega a lenei matagaluega, aemaise foi i latou mai komiuniti a le Pasefika i totonu o le atunuu.
