O le mae’a filifilia ma pasia ai e le Kapeneta o sui mo le Komisi su’esu’e o faigapalota, o le Aso Gafua asau e amata ai ona savalia e le komisi nuu ma itumalo faapalota o le atunuu.
O le faamoemoe o lea galuega o le sailia o ni finagalo e poupou ai se folasaga e ala i se lipoti e tuuina atu i le Palemene, e faamautu ai se isi ālafua e faatino ai faigapalota a le atunuu, aemaise o nisi auala e mafai ona faaofi e faaleleia atili ai, ae lafoa’i ni faaletonu sa vae manua ai faiga filifiliga ua mae’a aemaise i le palota tele ia Aperila o le tausaga na te’a nei.
O le a fesiligia ni finagalo o le atunuu i ni vaega se sefulu ua vaevae iai e le komisi le latou sailiiliga, e aofia ai Lola Palota, nofoa o sui tamaitai, Itumalo Faaleaganuu, agavaa o sui tauva, resitala o vaega faaupufai, soligatulafono ma faamasinoga, palota a tagata Samoa o loo aitau malele i atunuu i fafo, sui o vaega faaupufai, faatulagaina o le ofisa o faiga palota, ma nisi mataupu lautele e patino i faigapalota.
Talu ai lea galuega tāua e tausisia e le komisi ia latou su’esu’ega le taimi e faatino ai ina ia sologa lelei ma vave le faatinoina o le oo atu i itumalo faapalota uma e 51, ua ave ai le tuualalo a le komisi i le paia maualuga o le atunuu ina ia taofia tapenaga mo ni faaaloaloga masani e tusa o tu ma aganuu a Samoa. O le Itumalo faapalota o le Vaimauga Numera Tasi o le a tala malae i le sailiiliga a le komisi e pei ona faatulaga mai o le Aso Gafua 13 o Iuni e amata ai.
O le itumalo palota lea ua aofia ai afioaga o Laulii, Letogo, Vailele, Maugafiafia ma Fagalii. O le amatalia o lea galuega ua faatulaga ai foi e le komisi o le amataga o le vaiaso fou e tatala ai foi ma le upega tafailagi o le https//coi.oec.gov.ws e aumai ai finagalo tusitusia o soo se tasi o le atunuu. O ia faamatalaga uma o le a malupuipuia mo iloiloga a le komisi.
