O le vaiaso nei ua faailoa e le Minisita o Tupe le afioga Mulipola Anarosa Ale-Molioo, o le a amata faatalanoa ai e le Matāgaluega o Tupe ma le pulega o le UTOS, le faalapotopotoga o teugatupe o mavaega tausi a Samoa le toe aumai o se vaalele tele 737-800.
Na faailoa lea tulaga e le Minisita ina ua fesiligia se tapenaga a le faigāmalo a le Faatuatua i le Atua Samoa ua Tasi, i se isi o ana anavatau sa finau ai i le faigāpalota tele ua mae’a, lea sa folafola ai le aumai o ni vaalele tetele se lua.
Le afioga Mulipola Anarosa Ale-Molioo o le Minisita o Tupe.
Ua toe sefulu miliona tālā aitalafu a le kamupani vaalele o le Samoa Airways o loo totogi i le taimi nei, ae na ulufale atu le faigāmalo muamua a le Faatuatua i le Atua Samoa ua Tasi i le tausaga e 2021 e 80 miliona aitalafu o loo iai.
O le aofa’iga o tupe gau sa iai a le kamupani vaalele e 102 miliona ae o le taimi nei e pei ona faailoa e le Minisita o Tupe ua faaitiitia ia tupe gau poo accumulated losses i le 22 miliona tala.
