Ua amata nei fuafuaga o le faasolo ai o galuega tausavali a le soifua maloloina mo le faia o tui puipui i faaitu o Northland; mo le faama’i pepesi o le misela.
Ua faia lenei galuega ina ua oo mai faamatalaga i le faamaonia mai ai o ni tagata e to’afā ua aafia i le misela.
Tā’ua i ripoti mai le leitio faavaomalo o Niu Sila, 4 ni mobile clinics ua faatulaga nei e le Ngāti Hine Health Trust e agai iai tagata mo le faia o tui puipui; e pei ona faamauina i faamatalaga o lea itu o le atunuu (Northland) o loo pa’ū maualalo ai lava le numera o tagata ua mae’a faatino iai tui puipui.
Faamanino e le Pule Sili, Tamati Shepherd-Wipiiti – amata atu i le Aso Lulu o le a vaaia le faasolo ai o nei galuega faatino agai atu i itu o Waitangi ma Kerikeri.
Tā’ua foi e le alii pule sili, e mafai foi e le mamalu lautele ona faafesootai atu le numera o le Healthline i le numera 0800 611 116 ma o le a mafai ona fesoasoani atu iai latou e fetu’unai le faatino ai o a latou tui puipui.
Ae na ia fautuaina tagata, mo ē ua vaaia auga o le faama’i ina ia nofo’esea ma e lē fautuaina le agai atu i le clinic; ae afai ae ua iloa le aafia i le misela, ona valaau atu lea o le ofisa ona agai atu lea o le ‘au galulue i nofoaga ma itu o loo iai.
Ua fautuaina malosi e Tamati tagata lautele ina ia faaaoga tatau lenei avanoa, ina ia mautinoa o loo maua le fesoasoani e tatau ona o latou maua; aemaise ia mautinoa o loo puipuia i latou mai lenei faamai o le misela.
Puna o Faamatalaga: https://www.rnz.co.nz/news/national/574431/mobile-clinic-hits-the-road-after-outbreak-of-measles-in-northland
