Ua taunuu se tasi o fuafuaga a le Malo i le faaleleia o le auaunaga tau eletise i le atunuu, e pei ona amata faaaogā ai nei afi suauu fou se fā e gaosi ai le eletise.
O se fuafuaga ua faaaogā ai le 3 i Upolu e pei ona mae’a faatutū i Fuluasou, ae o le isi tasi ua faaaogā i Savaii.
Ua faailoa e le Minisita o le faalapotopotoga tau eletise le tofa Olo Afoa Fiti Vaai o afi ua amata faaaogā nei o se tapenaga e autu i le siitia o le faaaogāina o le eletise, aemaise o le fono a Malo o le Taupulega o le a matuā siitia ai le manaomia o lea auaunaga.
Faaalia e le Minisita i le tatalaina o le tautua a ia afi fou tau eletise o le lelei o tulaga tau tupe a le faalapotopotoga na faatupe ai le aumaia o ia afi i le tau e 10 tesimale 7 miliona tala.
O se vaega o le saunoaga a le Minisita o le Faalapotopotoga o le malosi tau eletise e aofia ai galuega tetele ma fela’ua’iga, le tofa Olo Afoa Fiti Vaai.
O le afioga i le Fofoga Fetalai o le Palemene susuga Papalii Li’o Oloipola Ta’eu Masipa’u na ave iai le faaaloalo na te ootiina le lipine e tatala aloaia ai le faaaogāina o ia afi eletise fou ua gaosi ai le eletise mai le suauu.
