Ua amata faagasolo i lenei vaiaso a’oa’oga mo le to’a 51 o le vasega fou o malu o le malo, lea o loo faatulaga e 16 vaiaso o ia a’oa’oga o loo faafoe i le nofoaga o a’oa’oga o tomai faaleoleo i Tafaigata.
E 41 alii ae to’asefulu tama’ita’i o le vasega fou o leoleo ma o le a faaopoopo atu lea numela pe i’u manuia le taumafai i le vasega o alii ma tama’ita’i o loo tautuaina le Matāgaluega o Leoleo, Falepuipui ma le Toe Fuata’ina.
O le ‘ava o le feiloa’iga na tatala ai le vaiaso o a’oa’oga mo le vasega fou o alii ma tama’ita’i ua sii o latou aao e fia auauna o ni malu o le malo i le faamalosia o le tulafono.
