Na amata mai le Iunivesite a’oa’o a Samoa ona a’oa’o ai le gagana a le atunuu o Saina, sosoo ai ma se nofoaga i le lotoā i Malifa o loo iai le ofisa autu o le Matagaluega o Aoga Taaloga ma Aganuu, ae o lea ua oo atu nei le a’oa’oina o lea gagana i le a’oga a le Faalapotopotoga o le Toomaga mo ē Puapuagatia, o loo aooga ai fanau o loo nonofo i le nofoaga i Tuanaimato a le faalapotopotoga ona o puipuiga mai sauaga ua aafia ai.
O le Amepasa o le Malo o Saina i Samoa sa ia faalauiloa aloaia le oo atu o le a’oa’oina o le gagana a lona atunuu i le aoga a le Toomaga, ma sa ia faailoa ai le agaga fiafia o lona Malo, ona o loo faaauau pea sootaga mafanafana ma le vavalalata o atunuu e lua, o loo faatino e le gata o galuega fesoasoani a lona Malo, ae o le tulaga i le fetufaiga o tu ma aganauu faapea ma gagana.
O se tasi lea o gagana ua talitonu le toatele ua tatau ona a’oa’oina ina ia malamalama lelei ai o tatou tagata, aua e le gata o fanau ua malaga i avanoa sikolasipi a Saina, ae o tagata o lea atunuu o loo galulue i Samoa, faaopoopo iai ma nisi o tagata Saina ua faagaioia i Samoa a latou pisinisi.
