O le tamaitai o Vikki Garrett, o le pule o le faatoaga o le Pick Hawkes Bay i Niu Sila na amata galue ma seei i lea tofiga talu ona amata galuega faavaitaimi i totonu o Aotearoa i le tausaga e 2007.
O le taimi foi lea na amata ai ona mafuta o ia ma tagata mai Samoa e maua galuega faavaitaimi i lea nofoaga. O nai vaiaso e lei mamao atu na faamautu ai le mafanafana o le mafutaga a Vikki ma aufaigaluega faavaitaimi mai Samoa ina ua faaee iai se suafa matai o le Finauimalo o le afioaga o Safotu.
Faaalia e Finauimalo Vikki Garrett ina ua maua se avanoa e faatalanoa ai, o se suafa matai ua fetaui lelei lona uiga ma lona faamatalaina aua o ia o se tasi o loo finau malosi mo le lelei o tagata faigaluega faavaitaimi mai Samoa e le gata i le motu o Upolu ae faapea Savaii.
E silia i le 200 au malaga o tagata faigaluega faavaitaimi mai lo tatou atunuu e malaga i Niu Sila i tausaga taitasi ma galulue i le faatoaga o loo pulea e lea tamaitai.
O lona fiafiaga tele ua ia vaai ma molimauina le seleselega o tupe o loo maua e o tatou tagata mai ia galuega ina ua ia asiasi mai ma silasila i maota ma laoa ua fausia faapea meatotino e pei o taavale ua faatau ona o galuega faavaitaimi.
O le mafutaga foi a le tamaitai pule ma o tatou tagata ua mafai ona maua ai lona silafia i la tatou tu ma le aganuu faasamoa ma o se fesoasoani lelei lea mo ia e malamalama atili ai i faafitauli e tutupu i nisi taimi a o valavala ai o tatou tagata e maua ia galuega ma o latou aiga i Samoa.
