E toalima tamaitai ae toasefulu tamalii ua amanaia e le Malo i ana pine ma faailoga taualoa lo latou sao ma le tautua i galuega i tomai eseese faapea taaloga.
O i latou uma ia e toa sefululima na tauaao iai pine ma faailoga taualoa i le sauniga na tapunia ai polokalame o le 12 masina sa faailoga ma faamanatu ai le atoaga o le 60 tausaga o le Tutoatasi.
O le toatele o i latou ua faamanuiaina ua silia i le 70, 80 ma le 90 tausaga o le soifua.
E toatasi le tamalii ua 50 tausaga o le soifua ae o lana tautua i le atina’e o taaloga siisii uamea mamafa ua tu maualuga ai Samoa i le lalolagi ina ua ausia e le atunuu le pine siliva i taaloga a le Olimipeka faapea pine auro e tele sa manumalo ai Samoa i le sailiga siamupini a le lalolagi.
O i latou ua tauaao iai pine ma faailoga taualoa, o le afioga i le Tamaaiga Tuiatua Tupua Tamasese Efi, afioga Asi Tuiataga James Blakelock, Gatoloaifaana Tilianamua Afamasaga, Palanitina Tupuimatagi Toelupe, Tuatagaloa Joe Annandale, Tusani Iosefatu Reti, o le alii felela o Brother Kevin O’malley, susuga i le faifeau penisione malolo o le EFKS Tautiaga Senara, susuga i le faifeau penisione malolo o le Ekalesia Metotisi Tupu Folasa II, afioga i le tamaitai Sa sister Emanuella Betham, afioga Asuao Taalili Williams, tamaitai tausi soifua afioga Luaipou Sally Betham, afioga Sapa’u Lilomaiava Pitovao Lolesio Vitale, tausi soifua le faletua ia Solialofi Tuaimalo Papalii, ma le afioga Tuaopepe Jerry Wallwork.
