O faamaumauga mai le matagaluega o leoleo e pei ona faailoa lautele i lenei vaiaso i le feiloaiga ma le vasega o tusitala, ua iloa ai le saoasaoa o le siitia maualuga o le numera o tagata i lo tatou atunuu ua fano soifua ona o le pule i le ola talu mai le amataga o le tausaga nei, e fua i le 12 masina o le tausaga na tea nei.
O le tausaga 2021 e toa sefuluiva na maliliu, ae o le tausaga lenei o lea e lei mae’a, ae ua faamauina e to’a 28 ua maliliu i le pule i le ola.
Ua faaalia e le sui komesina o le matagaluega le susuga Papalii Monalisa Tia’i Keti, e le o matua manino lelei poo ā mafuaaga, ae o le tele o mataupu faapenei o loo atagia ai o ni mataupu faalotoifale i totonu o aiga e fesootai i nisi mataupu tau pule i le ola.
Faaalia foi e le sui komesina, o loo lilifa le matutua o tagata ua fano soifua i le pule i le ola iai latou i le va o le 20 ma le 30 ma ona tupu le matua o le soifua.
O le faalapotopotoga o le Faataua le Ola ma nisi auaunaga tuma’oti o loo gafa ma polokalame e fesoasoani atu ai i tagata ua manaomia le fesoasoani i ni mafatiaga e taofia ai le faia o ni faaiuga e ma’umau ai le ola ma le soifua.
