O le aso ananafi lea ua aloaia ai le faaulu o le tagi i le tulafono a le ofisa loia o le Maurice Blackburn Lawyers ma isi ofisa loia e lua ua o latou galulue faatasi e ave le tagi faasaga i le Medibank.
O le Medibank o se tasi lea o kamupani inisiua tau le soifua maloloina i Ausetalia ae sa suesueina e ofisa loia nei e tolu talosaga sa faia a tagata mo ni taui e faatatau i le mataupu na aafia ai faamaumauga faalilolilo i luga o upega tafailagi ina ua osofai foi e nisi.
Ua faailoa mai e ofisa loia e faitau afe a latou paaga ua mae’a ona faaulu ane suafa ma lesitala mo le tagi lea.
E talitonu leoleo o i latou e faaigoa o hackers i le faaperetania o loo latou osofaia upega tafailagi ma ua o latou maua ai le faitau miliona o faamaumauga a paaga a le Medibank i se osofaiga na faia ia Oketopa talu ai.
Fai mai loia o le tulai mai o lea faaletonu o se lamatiaga lea i paaga uma a le Medibank ma le solia foi o aiaiga o le tulafono faalilolilo, Privacy Act ma e iai le tiute o le Medibank e tatau ona fai e malupuipuia ai faamauauga uma a tagata o loo latou teuina.
