Ua aloaia le Ao fou o le Malo a Niu Sila, o King Charles III.
O le sauniga na faia i le palemene ananafi na fofoga aloaia ai e le kovana sili o Niu Sila, Dame Cindy Kiro i le aso lona 11 o Setema 2022 ua avea ai nei lē sa taua o Prince Charles Philip Arthur George, ae ua taua nei o King Charles III, o le Ao o le Malo.
O le sauniga i le aoauli ananafi na faia ai i le mae’a foi o le sauniga na faia i Peretania i le Aso Toonai (taimi Niu Sila) e aloaia ai le tulai mai o King Charles i le tofi, ma o le talafaasolopito o lea sauniga o le uluai taimi lea ua faasalalau ai i luga o televise e tusa ma le pule a le Tupu fou.
E ese mai i faaaloaloga masani ma sauniga faalemalo ananafi, o le aso foi ananafi na tuua ai e le silia ma le 30 sui o le militeli a Niu Sila le atunuu mo Peretania ina ia auai i sauniga mulimuli o le Tupu Tamaitai.
