Ua aloaia nei le soloia ma le toe aveesea o lafoga totogi a Faifeau tausi nuu o aulotu ma ekalesia eseese i lo tatou atunuu, ina ua pasia ai e le Fono Aoao Faitulafono le lipoti a le komiti a le Palemene sa toe iloiloina teuteuga o le tulafono o lafoga o tupe maua. 

O ia teuteuga na faaulu atu i le Fono Aoao i le masina o Tesema o le tausaga na te’a nei, ae na pasia i le faitauga faalua ma soalaupule ai e le fono usu a Samoa i le masina o Fepuari o le tausaga nei. 

Na tuuina atu ai loa i le komiti o le vaega tau i le tamaoaiga latou te iloilo ma lipoti atu ai i le Palemene e pei ona sa faataatia lea lipoti ma pasia ai le faitauga faatolu o teuteuga mo le tulafono autu. 

I le soloia o lafoga a faifeau tausi nuu o loo faaalia e le komiti i le latou lipoti sa toe tapa ni finagalo o le atunuu i teuteuga aemaise o faafeagaiga o ekalesia eseese. I ia finagalo ma molimau tusitusia na tuuina atu e lilifa manatu ma lagona faaalia i le aveesea o le lafoga. 

O le pasia o teuteuga o le tulafono o tupe maua o lafoga e faasino i faifeau tausi nuu, ua soloia ai ma le teuteuga na pasia i le paea’iga ua mavae a le Palemene na avanoa ai ona totogi lafoga a faifeau tausi nuu mai tupe e maua i o latou alofa poo peleti. 

O se tasi lea o manulauti ma faiga faavae sa finau ai le vaega faaupufai o le Faatuatua i le Atua Samoa ua Tasi, a tula’i mai e avea ma faigamalo fou o le a latou toe faasolomuli lafoga a faifeau tausi nuu.