Ua iai lipoti ua faailoa ai le sailia e Saina o se maliega e aofia ai atumotu o le Pasefika i mataupu ma polisi e pei o tulaga tau le puipuiga, security ma faamatalaga tau fesootaiga ma ua ta’ua o loo fuafua se fonotaga ma le Minisita o le Va i Fafo a Saina, Wang Yi i le vaiaso fou i Fiti.  

O loo ta’ua i le lipoti a le RNZ o se fuafuaga faaata e lima tausaga na tuuina e Beijing i atumotu e 10 o le Pasefika a o lumanai ai le fonotaga lea i le aso 30 o Me lea ua mafua ai ona toe faamaamulu se tasi o atumotu na valaaulia ona ua ta’ua e faailoa ai ii le fuafuaga a Saina e pulea le itulagi ma faamata’u ai i le nofolelei i lea faaitu.  

Ta’ua i le lipoti o se tusi na tuuina i atunuu e 21 o le Pasefika, na silasila iai le ofisa faasalalau o le Reuters, na ta’ua ai e le peresetene o le Federated States of Micronesia, David Panuelo e faapea o le a finauina e lona atunuu le teena o lea fuafuaga ona o le popolega ina ne’i amata ai se Cold War i le va o Saina ma le West.  

Fai mai o le a asia e Wang atumotu o le Pasefika e 8 o loo iai sootaga ma Saina mai le va o le aso 26 o Me ma le aso 4 o Iuni. O loo teena uma e Beijing ia faamatalaga ma lipoti fai mai a latou o le maliega e taulai i faiga polisi i le Atu Solomona ma o le faalavelavegia mai e isi atunuu ua faalavelave ai foi i le faiga o faaiuga a le Atu Solomona lava ia.