Ua faasolo ina mae’a laugatogi ma faauuga o seleselega a fanau o lenei tausaga faaleaoaoga o le a mae’a, ma o le vaitau foi lenei o le loimata maligi i le fiafia ona ua faaiuina ma le manuia taumafai o nisi o fanau, ae o loimata maligi foi ona ua lē i’u lelei seleselega ona o nisi o faafitauli ma mafuaaga.
O le laugatogi ma le faauuga a le Kolisi a le Ekalesia a Iesu Keriso o le Au Paia o Aso e Gata Ai i Pesega ua molimauina ai le faafiafiaina o matua o fanau e 85, ua talia a latou talosaga na tuuina atu i le faalapotopotoga o tama ma teine tuai o le kolisi ua faamautu i Niu Sila le CCWS Alumni, latou te totogi ni vaega o o latou pili mo le tausaga fou 2023.
Ua tele tausaga o faatino lenei fesoasoani e le faalapotopotoga i Niu Sila, ae o le tausaga nei ua talia uma talosaga e 85 ona ua silasila alofa i tulaga faigata sa feagai ma matua i le taimi o le faamai Koviti-19, lea sa tele faafitauli ma luitau tau tupe sa feagai ma i latou.
Ua faaalia e se sui o le faalapotopotoga sa malaga mai e tauaao le fesoasoani i le Aso Faraile na tea nei na faia ai le laugatogi, le faletua o Tamaitia Fepulea’i, e iloilo talosaga taiatasi ma o fanau e sili ona faaletonu tulaga tau tupe a o latou matua, o fanau ia e ave iai le fesoasoani.
Ua momoli le faafetai a le faletua o Tamaitia Fepuleai i sui o le latou mafutaga o tama ma teine tuai i Niu Sila, o uo ma aumea mamae faapea kamupani o loo avea ma lagolago autu le Black Sand enterprises, i le lima mafola ma le aao foai o loo mafai ona faatino ai pea le latou polokalame sikolasipi e ala i le fesoasoani e totogi pili o nisi o fanau i le Kolisi i Pesega i tausaga taitasi.
