I le pule faasoa a le afioga i le Minisita o Tupe ma lana matagaluega faapea le malo i le tala o le tupe a le malo i lenei tausaga, ua faailoa mai ai e le afioga i le Minisita o Fesoota’iga ma Faamatalaga Tekonolosi le afioga ia Hon Toelupe Poumulinuku Onesemo, ua aga’i i luma tupe ua tuuina atu e le malo e faatinoina ai galuega a lana matagaluega i lenei tausaga.
O le tala o le tupe ua faamatuu atu ai e le malo le sefulutolu miliona i lea matagaluega, ma e iai le talitonuga o le afioga i le Minisita e oo atu i le isi 3 i le 4 tausaga o i luma ua atili ai ona lelei le tupe maua.
O le matagaluega lenei sa amata mai i aso la, a o ta’ua o le matagaluega o Falemeli ma Fesoota’iga, sau ai, sau ai ua siitia le tulaga o fesoota’iga aemaise o tulaga tau telefoni, auā o telefoni sa amata mai ai ona vavae ese mai loa lea o le auaunaga tau telefoni lea na amata ai loa le SamoaTel.
Ona maua ai loa lea o le matagaluega lenei, latou te mata’itūina galuega a le SamoaTel ma kamupani telefoni.
O le matagaluega la lenei lea sa iai loa le Ministry of Telecommunicationa & Post Office.
Sau ai, sau ai, ona faatū lea o le matagaluega lenei o le Regulator latou te vaaia auaunaga o fesoota’iga ae faatau ese atu le SamoaTel, auā o le kamupani a le malo, lea na faatau atu e le Blue Sky, ma toe faatau ese atu e le Blue Sky lea ua avea nei ma Vodafone.
Sa iai foi le kamupani telefoni e igoa o le Samoa Telecom Cellular i aso la, lea ua faatauina nei e le Digicel lea ua fesuisuia’i i le taimi nei.
Silasila i le tulafono i le taimi nei, o matafaioi ma galuega faatino i le malosiaga na te vaaia ai kamupani telefoni o loo i lalo uma o le Regulator, ma o loo toe tilotilo le iloiloina o lenei tulafono ina ia mafai ona faatino e le matagaluega o fesoota’iga faiga faavae talafeagai ma tulafono auā le atina’eina o lenei vaega tāua o fesoota’iga.
Ta’ua e le afioga i le Minisita ia Hon Toelupe le tāua o auala o fesoota’iga aemaise lava i lenei vaitau.
E pei ona ta’ua foi e le afioga i le Palemia o Samoa o auala o fesoota’iga o le lumanai manuia.
I le taimi nei e lē o tele ni galuega o loo faatinoina e lenei matagaluega o fesoota’iga, peitai o loo iai tapenaga o loo i tua atu ina ia toe faamalosia lenei matagaluega.
O loo toe tilotilo foi le malo ma le matagaluega i le toe faia o ni pou i nofoaga ma itumalo o loo faaletonu ai le fesoota’iga e pei o Sataua ma Falealupo, e faapena foi i nisi vaega o Falealili faasolo atu i Aleipata.
