O loo talimalo lo tatou motu o Savai’i i le vaiaso nei i le fa’aili a fitafita o le laueleele a le malo o Niu Sila, e pei ona sa muamua afea ai le afioaga o Asau ma le Ekalesia Metotisi i Gataivai i le Aso Lua o lenei vaiaso.
O le Aso Lulu ua afea ai le Kolisi o Tuasivi ae o le afiafi i le itula e 5 o le latou fa’afiafiaga i le Hall a le EFKS i le afioaga o Sapapalii.
O le Aso Tofi o lenei vaiaso o le fa’afiafiaga mulimuli a lea fa’aili pu e faia i le maketi i Salelologa ona taliu mai ai lea i Upolu ma sauni e toe malaga i Niu Sila i le aso Faraile le faaiuga o lenei vaiaso.
O le molimau mai nofoaga sa fa’afiafia muamua ai le fa’aili a le fitafita a Niu Sila i Savai’i, o se fiafiaga i le toatele ua toe fa’afofoga ma silasila i ni fa’afiafiaga ase fa’aili pu auā ua tele tausaga ua lē toe iai ni fa’aili faapea i Savai’i, sa tele afioaga i tausaga ua mavae sa fai a latou fa’aili pu, lea sa fa’afiafia ma tauvā i aso e faamanatu ai le tutoatasi o Samoa.
