O le Aso Faraile lenei i Samoa na taunuu ai i laufanua se tasi o sui sinia o le Malo tele o Amerika, o le sui failautusi poo le sui Minisita o mataupu tau i le va i fafo o lea Malo le tamaitai o Wendy Sherman.
Na feiloai atu o ia i le ta’ita’i o le Malo le afioga i le Tamaitai Palemia, Fiame Naomi Mataafa, ma faia ai ni talanoaga i mataupu tau i le va o Malo e lua. Na aofia i mataupu sa faasoa iai le ofisa sinia o lea Malo ma le tamaitai Palemia ni fesoasoani mo Samoa i le itu i suiga o le tau, ma le puipuiga.
O le faato’ā toe afea lea o Samoa e se ofisa sinia o le Malo o le Iunaite setete o Amerika, i le tuanai o le 14 tausaga na afea ai lo tatou atunuu e le Failautusi o le va i fafo o lea Malo poo le secretary of state le tamaitai o Condoleeza Rice.
