Ua afea le galuega a le faalapotopotoga o le Toomaga mo ē Puapuagatia i Samoa i le agalelei o le kalapu a le Roteri i Kalaiesetete Niu Sila o se foai tupe e silia i le 4 afe tala.
O se fesoasoani ua faailoa e le faalapotopotoga o le a faaalu i le tausiga o fanau ua sauaina, aemaise o tapenaga tau tulafono mo nisi o mataupu tau i sauaga o le a folasia i le faamasinoga.
O le faauluuluga o le kalapu o le Rotary Club of Riccarton i Kalaiesetete le susuga Alan Smith na malaga mai ma lona faletua e faaoo le latou foai i le Toomaga, ma ua ia fautuaina ai le faalapotopotoga e faailoa atu nisi manaoga e pei o vaega mo le a’oa’oina o fanau o loo i le vaaiga a le Toomaga mo ē Puapuagatia.
O sui o le kalapu a le Roteri i Samoa na tautoaluaina sui o le kalapu mai Niu Sila i le tauaaoina atu o le foai tupe.
O le auaunaga a le Toomaga i Samoa e faalagolago i le agalelei ma le alofa o tagata taitoatasi, pisinisi ma aulotu faapea faalapotopotoga i fafo e pei o le Roteri.
