Ua faamautū i le Aso Lulu o lenei vaiaso le taliaina e le polokalame fesoasoani a le malo o Iapani o foa’i tupe e faaleleia ai le auaunaga a le falema’i faamamā toto i le matāgaluega o le soifua mālōlōina, faapea le galuega o le toe faaleleia o le falea’oga o le Kolisi o Aleipata.
Ua faailoa e le ofisa o Iapani i Samoa le sainia ai o le maliega ma le pulega o le falema’i faamamā toto mo le faamatuuina o se vaegatupe e 349 afe 413 tālā e faatau ai se taavale i le faamoemoe e faaaogā i galuega o le siakiina o fatuga’o i nuu ma afio’aga i tua.
O lea foi fesoasoani tau tupe o le a faatau ai isi meafaigaluega e faaaogā i le siakiina o le suka ma le toto maualuga o nisi o aafiaga tau gasegase e fesoota’i i le faaleagaina o fatuga’o.
O le Kolisi o Aleipata e $353,000 se vaegtupe o le a toe faaleleia ai lo latou falea’oga ina ia saogalemu le nofoaga o loo a’oa’oina ai fanau a lea kolisi.
O le sui o le malo o Iapani le alii Amepasa o Susuki Ryotaro sa sainia maliega ma sui o le falema’i faamamā toto ma le Kolisi o Aleipata e faamautū ai ia fesoasoani.
