Na aafia le Palemene o Niu Sila i se osofaiga i komepiuta ma le faaaogaina o le initaneti, cyber attack ma fai mai se kulupu mai Lusia o latou na faatinoina lea tulaga.
I se lipoti a le Newshub ua faailoa ai o se kulupu mai Lusia ua o latou faailoa lo latou tuuina i lalo o nisi o upega tafailagi a Niu Sila e aofia ai ma le Palemene, o se vaega o la latou tetee atu i le malo ma le lagolago o loo tuuina ia Ukraine.
Ua faamaonia ane e se sui mai le maota o Sui, David Wilson i le Newshub o le upega tafailagi a le Palemene sa aafia i le po o le Aso Gafua ae sa vave ona foia le faafitauli ona o le vave o le gaioi a le vaega o le IT a le Palemene.
I se feau na tuuina ane i se telegram i le Aso Gafua na faailoa ane ai e le kulupu lea le hacker, o Niu Sila sa tuuina ni ana sā i luga o Lusia ina ua o latou osofaia faasolitulafono Ukraine ma sa fesoasoani foi i le toleniga o fitafita a Ukraine.
