Ua aafia aiātatau a le faipule o Lepa ma le faipule o Faleata Numera 3 e tusa o le Vaega 9 puipui(1) o le Tulafono Faavae, ina ua lē tāpā se finagalo o le susuga Tuilaepa Lupesoliai Sailele Malielegaoi ma le tofa Lealailepule Rimoni Aiafi, i le vaega o le fautuaga a le komiti o tulaga mamalu ma aloa’ia a le Palemene lea na talia e le Fono Aoao Faitulafono, e faasino i le faasalaga poo le penalty o le faamālōlō lē tumau seia iai se aso.

O lea faamālōlōga lē tumau na faamuta e le faamasinoga i le Aso Lua o lenei vaiaso ina ua aumai lana faai’uga, ma ua toe faaauau ai tiute faafaipule o le ta’ita’i o le Itu agai ma se tasi o faipule sinia o le Itu agai.

O le i’uga lenei ua taatia atu ai e le faamasinoga i le Palemene i so latou lava finagalo pe toe tagofia le aiaiga e faasino i le faasalaga e avanoa ai ni finagalo o sui faipule na faamālōlō lē tumau.

Ua faaalia le faafetai a le ta’ita’i o le Itu agai ma lona agaga fiafia i le taunuuga o le mataupu aemaise le faai’uga a le faamasinoga.

Se finagalo o le susuga Tuilaepa Lupesoliai Sailele Malielegaoi i auala o fesoota’iga televavave a le patī faaupufai e puipuia aiātatau a tagata, ina ua mae’a ona lau le faai’uga i le aoauli o le Aso Lua.

Ae o se vaega o le faai’uga lenei o loo faailoa ai ni atugaluga o le faamasinoga i ni vaega o tulafono tumau a le Palemene e faasino i le tulafono o tulaga mamalu ma aloa’ia o le tausaga 1960, le tulafono lea ua ta’ua o le Legislative Assembly Powers and Priviledges Ordinance.

O ia atugaluga ona o le silasila a le faamasinoga, e iai aiaiga o lea tulafono o loo noatia ai le avanoa o faipule e tuuina atu ni finagalo i se sailiiliga e tusa o aiaiga o le Vaega 9 puipui(1) o le Tulafono Faavae e faasino i aiātatau e faaali ai se lagona o se faipule i le aiaiga faaletulafono ua ta’ua o le natural justice.

Ua avea le tulaga ua lē mafai ai ona ausia le tulaga tutusa ma talafeagai o aiātatau e pei ona aiaia i le Vaega 9 puipui(1) o le Tulafono Faavae.

O le faai’uga a le Fono Aoao Faitulafono i le solia e sui faipule o le Faalemigao i le Palemene poo le Contempt of Court, ua lē tele iai se finagalo o le faamasinoga ona e le’i afea i ni finauga tuusa’o a o su’esu’eina le lu’i faaletulafono.

Ua manatu ai le faamasinoga o le a lē oo iai sana faamatalaga e toe faalavelaveina ai le taunuuga o sailiiliga a le Fono Aoao i lea tulaga.