O lea ua savali le valu masina o leiloa le alo tamaitai o le tina Kapiti, ma a o mafatia ai o lea ua ia tapenaina se savali mo aiga mafatia o loo ui i le auala lava e tasi o loo ia uia.
O le aso 28 o Aokuso o le tausaga talu ai na amata sue mai ai le tamaitai ia Breanna Muriwai o Kapiti, ma e oo mai i le aso e lei maua lava.
O le taimi mulimuli na vaaia ai o le matafaga i Te Horo i Kapiti Coast ma mai lea taimi e lei mapu ai le tina ia Jasmin Gray i ana faasalalauga faia i luga o le Facebook ma valaau mai i le poo ē na faia e faailoa atu poo fea o iai pe afai poo soifua pea, a leai o fea o iai lona tino.
O Muriwai o se tasi o le toasefululua o tagata e oo mai lava i le aso o loo sue pea lava e leoleo ma o loo faaigoaina o tagata leiloloa.
A o mafatia ai pea le tina o lea ua ia taloina se savali faapitoa mo aiga mafatia o loo sue pea o latou tagata ma e faapea e faia i le masina o Iuni.
Mai le ofisa o leoleo e tusa ma le tali i tala a le Newshub, o loo faaauau pea suesuega i lenei mataupu.
