Ua faailoa e le Faatonu Sili aoao o le soifua mālōlōina i lipoti a le leitio a Niu Sila le faaopoopo pea o tagata i lo tatou atunuu e to’atele lava o fanauiti, ua masalomia le aafia i āuga o le faama’i tale vivini lea ua to’a 95.
O le fuainumera lea sa faamauina mai le masina o Setema e oo mai i le aso 8 o le masina nei o Tesema.
O le 14 o tagata ua faamaonia ua maua i le tale vivini ma e fulisia lava i fanau e i lalo o le tausaga le matutua.
Ua fautuaina e le Faatonu Sili o le soifua mālōlōina le susuga Aiono Dr Alec Ekeroma, le atunuu o loo foufou malaga mai mo mālōlōga o le faai’uga o le tausaga aemaise i le aumatutua ina ia fai o latou tuipuipui a o le’i malaga mai.
Ua mafua lea tulaga ona e lē o iai se tuipuipui o le tale vivini mo le aumatutua o iai i le taimi nei i le auaunaga a le matagaluega.
Faaalia ai e le faatonu sili aoao o loo faia fesoota’iga mo le aumaia o le vailaau mo ia tuipuipui e ui e lē taugofie.
