E to’afitu molimau a leoleo o le a tuuina atu a latou mau tuufofoga e lagolago ai le moliaga e tasi o le lafo o upu taufaifai, ua molia ai lē sa avea ma pule poo le Ofisa Sili o le pulega o tagata tafafao mai fafo le susuga Faamatuainu Lenata’i Su’ifua.
O molimau o le mataupu lenei o nisi o tagata faigaluega i le pulega o tagata tafafao. O le tuua’iga na faaulu e se tasi o tagata faigaluega a o avea lē ua molia ma pule o lea auaunaga a le Malo.
Sa faatulaga e su’esu’e molimau i le Aso Tofi i le faamasinoga fesoasoani e seei ai se faamasino sinia o le Faamasinoga o Fanua ma Suafa, peitai ua iai se suiga i le moliaga a leoleo, o le mafuaaga lea ua tolopo ai i le Aso Faraile o le vaiaso asau, ae tuu le avanoa i le loia a lē ua molia e silasila ai i suiga o le moliaga a le itu a leoleo. O loo teena e lē ua tuua’ia le moliaga.
