O le auaunaga faaleoleo a le Malo o Ausetalia, le Australia Federal Police o se tasi o paaga totino a le Matagaluega a Leoleo, Falepuipui ma le Ola Toe Fuataina, ua faaauala mai ai se fesoasoani a lea Malo mo le vaega o suesuega e ta’ua o le Forensic Unit a le matagaluega o leoleo i Samoa.
O masini ma isi vaega tāua e faaaoga i ia ituaiga o suesuega ua foai e lea Malo, ma o le Minisita o le Matagaluega ma le sui o le malo o Ausetalia sa molimauina le tauaao aloaia atu o lea fesoasoani i le Komesina ma le pulega o le matagaluega o leoleo falepuipui ma le ola toe fuataina.
O ia masini ma mea faigaluega o le a siitia ai le faatinoina o galuega tau i le suesueina o solitulafono, aemaise o lenei vaitau i le maoae o le tomai faatekonolosi ua manaomia tele ai le faaaogaina o masini faaonapo nei.
