O le VSA o se faalapotopotoga tele i Niu Sila e lē toe tau iloina lana tautua i atunuu eseese o le Pasefika, i ana galuega tauofo i soo se matātā auā atina’e eseese i totonu o atunuu.
O le tausaga lenei e atoa i ai le 60 tausaga talu ona amata galuega a le VSA (Volunteer Services Abroad) e lē gata i totonu o Niu Sila aemaise lava i ona sootaga atu i isi atunuu o le Pasefika.
O le afiafi ananafi na potopoto ai i se tasi o potu mo fonotaga a le Iunivesite a Aukilani i lona nofoaga i Aukilani i Saute (6 Osterley Way, Manukau City Centre, Auckland), nisi o itutino o le VSA i Niu Sila, aemaise lava i sui o le faalapotopotoga na mafai ona tautua i Samoa mo le tele o ni tausaga ua te’a faapea ma nisi o le mamalu o Samoa na maua le valaaulia e auai atu ma faalogologo a o talanoa faasoa nei sui o le VSA e toe tomānatu ai i le olaga fiafia ma le faamalieloto sa latou tofo i ai a o auauna o ni volunteers poo ni tagata sa galulue tauofo ai i Samoa.
O le lona lua ai lea o a latou polokalame faalauiloa mo lenei tausaga. O le ‘au’au o le faatasiga i lenei tausaga, o le Folauga – The Journey. Ua fetaui lenei ‘au’au a o talatala mai e sui o le VSA a latou galuega tauofo sa fesoasoani ai i faalapotopotoga i Samoa, o a’oga e pei o le Loto Taumafai mo fanau e iai mana’oga faapitoa poo mana’oga tumau, o le asosi a tina ma tamaitai Samoa o loo fai a latou tama’i pisinisi, ma nisi sa galulue i isi a’oga i Savaii i vasega o matātā eseese.
O nisi o sui sa fai a latou tautalaga i le afiafi anapo, o le susuga Pascal Brown sa amata galue i Samoa i le 1981. Na talanoa faamama’i Brown i taimi na galue ai i Samoa aemaise le mafanafana o ana sootaga faaleuo ma nisi o alii, tamaitai, o matai Samoa, sa telē so latou sao i le taa’ina o ona lagona na atili naunau ai e faaauau pea lana folauga e fesoasoani poo ai lava sa mafai ona talisapaia lana atutua faafaia’oga.
O le tamaitai Initia, o Moumita Das Roy sa talanoa foi i le faatinoga o lana tautua tauofo ina ua malaga mai i Niu Sila mai Initia i le 2019, ae o le tausaga 2021 na auai loa Moumita i le VSA ma latou galulue ai faatasi ma tina ma tamaitai faipisinisi i Samoa e auala atu i fesoota’iga faainitaneti, i le vaitaimi tonu ua taofia feoa’iga i le va o atunuu, sa mafai lava ona faaaogā le zoom e fai ai latou fono, ma faatalanoa ai auala eseese e faatino ai ma una’i atili a latou pisinisi.
Na sosoo ai le folasaga matagofie a le afioga Leta’a Maiava Daniel Devoe, e lei leva nei ona mālōlō litaea mai lona tofiga o le CEO mo le sosaiete a le Loto Taumafai. Sa talanoa Leta’a i le faigata o le tau atina’e maia o le Loto Taumafai. Mai le tele o lu’itau o le galuega, o le lu’itau sili o le leai o ni faia’oga ua iai tomai faapitoa mo le feagai ma a’oa’oina fanau nei e iai manaoga faapitoa. O le taimi foi o le afioga Leta’a na sui ai le nofoaga o le Loto Taumafai mai lona ulua’i nofoaga i Motootua ae ua sifi atu i lo latou nofoaga fou i Vaitele. E ui lava ua mālōlō litaea le afioga Leta’a o loo faaauau pea ona ia faalauiloa le telē o le aogā o nei tautua o galuega tauofo.
Na faai’u tautalaga i le tamaitai palagi o Jan Kennington, sa faaaalu foi ona taimi e fesoaosani ai i Samoa i le Loto Taumafai, aemaise lava i le fesoasoani atu ia i latou na galulue o ni faia’oga i le Loto Taumafai. O le tausaga e 2018 na auai atu ai Jan i le Loto Taumafai ma galue e tufa lona silafia i faiaoga i le auala e fesootai ai ma tamaiti. Na tele foi lona taimi sa fesoasoani ai e faatulaga le potutusi poo le library a le aoga. Ma ona o Jan sa galue i le matagaluega o aoga i Niu Sila, sa faigofie ai foi ona ia sailia aoga ma faalapotopotoga e lotomalilie e foai atu nisi o puna’oa mo le faaleleia atili o meafaigaluega.
Ma ua onomea le faamanatuina o lenei tausaga tāua i le FOLAUGA a le VSA auā ua laugatasia uma le faamanatuina foi o le 60 tausaga talu ona tuto’atasi le faigamalo a Samoa, aemaise foi le 60 tausaga talu ona osia le feagaiga o le faauooga a Samoa ma Niu Sila, le Treaty of Friendship.
Na faai’u manuia lea afiafi ma lagonaina e tagata uma sa auai le tāua o le auaunaga o loo faatino e lenei faalapotopotoga, le VSA, ma le faamoemoe o le a faaosofia atili ai le agaga e fia ofo atu le taimi ma le malosi e galulue fesoasoani mo le lelei o isi.
