Ua totogi atu nei e le malo o Niu Sila le $6 miliona mo Samoa, pe tusa lea ma le $10 miliona tālā Samoa o se tino i tupe e taui ai le tulaga pagātia na oo iai le atunuu, aemaise i itu saute o Upolu, na aafia gataifale i le vaatau a Niu Sila o le HMNZS Manawanui; e pei ona ua atoa i lenei vaiaso le tausaga talu ona tulai lea faalavelave.
Ua faamaonia mai lea tulaga e le Minisita o le Va i Fafo, Vaovasamanaia Winston Peters; ma na ia ta’ua o lea fuafuaga sa faatino ona o se talosaga mai le malo o Samoa ma na o latou faatino lava ma le agaga o le femalamalamaa’i e tusa ai ma lea mataupu.
Faaalia e Peters, o loo malamalama lelei Niu Sila i le telē o le aafiaga na oo i nai tagatanuu o lea faaitu o Samoa talu ai lenei faafitauli, ma e amana’ia lava tulaga o le oo atu o atugaluga ma tulaga ua faaalia ai le lē malilie o nai tagatanuu.
Faamanino foi e le Minisita o le Va i Fafo, o loo faatino pea talanoaga ma fetuuna’iga a malo e lua e tusa ai ma fuafuaga e faia i le vaa e pei ona iai pea i le gataifale o Tafitoala ma Siumu, peitai o le faamamafa o loo ave i le tuuitiitia lea o ni aafiaga tau i le siosiomaga ma fesoasoani e tuuina atu mo nei fuafuaga.
Mo le silafia o lenei mataupu na tulai mai i le tausaga talu ai 2024 ina ua pa’ulia i itu o Safata. E 75 le ‘au vaa na faasaoina mai i le Manawanui ina ua mu lenei vaatau a le atunuu.
Na māua i se ripoti e tusa ma lea mataupu, na faailoa ai lē lava o tapenaga o sui aemaise e le’i iai i se tulaga e ono tatau ai ona fealuai le vaatau o le Manawanui.
