O le molia ai e leoleo o le ta’ita’i o le Itu Agai i moliaga e lua o le faia o tala taufaaleaga ma gaioiga faasoesa e faaaogā ai fesoota’iga faatekonolosi ona o le tagi a le Minisita o A’oga ma Aganuu o le faipule o Aana Alofi 2, ua lipotia e le vaega faasalalau o le Talanei i Amerika Samoa, e 6 isi moliaga o le faia o talataufaaleaga ua molia ai lava le ta’ita’i o le Itu Agai le susuga Tuilaepa L Sailele Malielegaoi.
Ua faailoa ai foi o ia moliaga e māfua i se tagi ua faaulu e le ta’ita’i o le pati faaupufai o le Faatuatua i le Atua Samoa ua tasi le afioga i le Palemia susuga Laaulialemalietoa Leuatea Polataivao Fosi.
O lea lava lipoti o loo ta’ua ai o le tagi e māfua mai i ni saunoaga a Tuilaepa i auala o fesoota’iga i luga o upega tafa’ilagi i le lua tausaga talu ai.
O le aso 24 o le masina fou o Fepuari e tula’i ai o ia i le Faamasinoga Faaitumalo i moliaga a leoleo e māfua mai i le tagi a lē sa avea ma Faatonu Sili o le Soifua Mālōlōina le Minisita o A’oga ma Aganuu, afioga Aiono Alec Ekeroma.
