I le faalauiloa ai o le pesia o Samoa i le faama’i o le fiva o ponaivi poo le dengue fever, e 6 gasegase fou ua faamaonia, ma oo atu ai le numela i le 12 tagata ua aafia i le vairusi o lea faama’i.
O faamaumauga a le Matāgaluega o le Soifua Mālōlōina mai le aso 14 o Aperila i le aso 20 o le masina nei lava o loo faailoa lautele ai lea aofa’iga o gasegase o le fiva o ponaivi.
O le vaiaso nei ua toe a’e uma ai a’oga mo le kuata lona lua ma e iai le talitonuga o le vaiaso ua mavae sa galulue ai komiti ma faia’oga o a’oga uma i le atunuu e faamamā lotoā ma falea’oga mai lapisi ma otaota e to’a ai le vai e tau tuufua ai iniseti o namu e feavea’iina le vairusi o le faama’i.
O loo faamalosia pea fautuaga a le soifua mālōlōina i le atunuu atoa i auala o puipuiga mai lea faama’i.
