Ua mae’a le koneseti pese i Niu Sila na ofo ai taleni a nisi o tamafanau a Samoa i le faamoemoe autu e saili tupe e fesoasoani ai i le tausiga o tamā ma tina matutua i Mapuifagalele faapea le Nofoaga o Tamaitai Sa Monike i Vailima.

O le aao mafola o le atunuu na lafo e lagolago ai lea faamoemoe lelei, ua tau aao e Tamaitai Sa Monike le siaki e 25 afe tala, faapea le nofoaga i Mapuifagalele le isi 25 afe tala.

Ua matua ootia Tamaitai Sa o faauluulu ma vaaia ia nofoaga i le alofagia pea e le atunuu o le latou auaunaga ona ua faigata nei aso, ae o loo susue pea le faamalama o le Isaraelu moni ma silasila mai i Samoa e le gata o fuafuaga a ekalesia, ma nuu, ae ua oo lava i le tautua tatalo a Tamaitai Sa Monike, faapea le galuega a Tamaitai Sa i Mapuifagalele o loo alolofa ma avatu foai tupe e fesoasoani i le latou galuega. 

O le vasega o le kolisi o Sagato Iosefo o le tausaga e 1988, o le faalapotopotoga o le Malisi Sagato Iosefo, ma le faalapotopotoga o Uso ma le Taatia Mai, sa galulue e faatino lea sailiga seleni i Niu Sila ma maua ai le 50 afe ua vae lua tutusa i Mapuifagalele ma le nofoaga o Tamaitai Sa Monike.

Ni vaega o saunoaga mai le Peresetene o le vasega o le tausaga e 1988 a le kolisi o Sagato Iosefo o le Peresetene foi o le asosi o tama teine tuai o le Malisi le afioga Tuatagaloa Aumua Ming Leung Wai, ma le tamaitai Sa pule o le nofoaga o Tamaitai Sa Monike i Vailima.

O le uluai taimi na amata ai lenei foai sa na o le nofoaga i Mapuifagalele lea sa amatamea ai le susuga Filipou Pinati Williams o se tamafanau e talenia i le musika.

O le tausaga muamua lea e ono afe tala le seleni na maua ai, ae o le tausaga na tea nei e 20 afe tala sa mafai ona maua ina ua tuufaatasia e Filipou ma le PacificEzy le faamoemoe.

O le tausaga nei o lea foi tamalii sa faamaopoopoina tamafanau talenia i le musika a le atunuu mo lea lava faamoemoe, ma lagolago iai nisi o pisinisi ma kamupani i totonu o Niu Sila.