O le lē saofia o taumafaiga a le asosi netipolo a Samoa i le taamilosaga o le Ipu o le lalolagi talu ai nei, ina ua le maua se avanoa e tausinio ai i lea taamilosaga faavaomalo, e lē o solomuli ai le kalapu netipolo a tamaitai sa aoaoina i le Kolisi o Sagata Maria le Saint Mary’s Old Girls Association poo le SMOGA, i le unaia pea o le taaloga e ala i le faagasolo pea o lana taamilosaga o le Saint Super Four Netball e saili ai ni tamaitai malolosi ma agavaa e saili ai nisi o le ‘au a Samoa mo le isi Ipu o le lalolagi.
O le tau amataga o le masina fou o Tesema e faatino ai lea taamilosaga, peitai o seleni le autu o tapenaga ina ia lava taoso le asosi mo lana taamilosaga.
O le kamupani o le Pacific Ezy ua agalelei i le faatalauula a le SMOGA ma tauaao ai le meaalofa tupe e lima afe tala e fesoasoani i tapenaga o le Saint Super Four Netball tournament.
Faaalia e le sooupu mo tapenaga o le taamilosaga le tamaitai o Visceta Meredith o le lagolago a le Pacific Ezy, o se fesoasoani tāua mo le saga atinaeina o le taaloga ina ia siitia i se tulaga maualuga.
Le sui o tapenaga o le taamilosaga o le Saint Super Four Netball le tausala o Visceta Meredith.
