O le Aso Lulu na faamanatu ai le 50 tausaga talu ona faatino le auaunaga a le JICA i totonu o lo tatou atunuu, sa faia se sauniga ma se fiafia i le faletalimalo o le Taumeasina Island Resort e faamanatu ai le tele o tausaga ua ausia.
E le gata i lea sa faamanatu ai foi le silia i le 50 tausaga o le faigapaaga a Samoa ma le atunuu o Iapani faapea ai le aso soifua o le Emperor o lea atunuu.
O le JICA o se faalapotopotoga a le atunuu o Iapani latou te ofoina fesoasoani i soo se itu e aofia ai tulaga tau tagata faigaluega ofo fua mai (volunteers) o le itu tau soifua maloloina, e ala i aoaoga mo puipuiga o faamai lē pipisi faapea ai masini o loo manaomia e le falemai mo togafitiga, o aoaoga a fanau e pei ona fesoasoani ai i le fausiaina o faleaoga.
O mataupu tau suiga ogaoga o le tau, fesoasoani tau faatoaga faapea ai le tele o atina’e o loo ofo mai ai le fesoasoani a Iapani mo Samoa e tauala mai i lana polokalame fesoasoani ua ta’ua o le Japan International Cooperation Agency poo le JICA.
O le afioga i le Sui Palemia o le Malo o Samoa, Tuala Tevaga Iosefo Ponifasio na saunoa e ave le faamanuiaga mai lo tatou atunuu mo le aso soifua o le Emperor, o le faafetai i le faigapaaga faaauau pea ma lea atunuu, aemaise le sao o le JICA ia Samoa ma ona tagata.
