Ua iai le faaopoopoga e 50 o tagata i lo tatou atunuu ua faamauina e le matagaluega o le soifua maloloina le aafia i auga o le faamai Koviti-19 ma ua oo atu ai le aofaiga o tagata i Samoa ua maua i le faamai i le 15,889.
I lea aofaiga o le toa 179 o tagata na malaga mai fafo, o lona uiga e 15,710 tagata o nonofo mau i le atunuu ua maua i le faamai. O le lipoti lata mai lea a le soifua maloloina i totonu o le fitu aso na amata faitau mai le aso 28 o Aokuso e oo mai i le aso 4 o le masina nei o Setema.
Ua faamauina foi e le Soifua Maloloina, e toa 5 gasegase o le Koviti-19 o loo faataotolia mo le taimi nei i le Maota Gasegase i Motootua.
O lenei lipoti ua tuufaatasia ma auiliili ai faamaumauga o le faamai mai lava i le aso 17 o Mati o le tausaga nei ina ua faamaonia ai le pepesi atu ai i tua i le mamalu lautele o le atunuu.
O loo tālia pea se isi finagalo o le Malo e ala mai i le matagaluega o le soifua maloloina, poo afea se aso ma se masina a o totoe ai le 3 masina mae’a lenei tausaga, o le a faamuta ai aiaiga o puipuiga o le faamai ina ua toe saoloto le fegasoloai o tagata ma ua faamuta foi vavao ma aveesea puipuiga o le faamai i lalo o aiaiga o faalavelave faafuasei.
