Ua faaauau nei le tofiga Ao o le Malo mo le lima tausaga mulimuli mo le afioga i le Tui Aana Tuimalealiifano Vaaleto’a Sualauvi II, ina ua talia e le Palemene le faai’uga a le faigamalo a le vaega faaupufai o le Faatuatua i le Atua Samoa ua Tasi. 

O le ta’ita’i o le pati faaupufai le afioga i le Palemia Fiame Naomi Mataafa, na ia tuuina atu i le Fofoga Fetalai mo le faasilasila faalauaitele i le Fono usu a Samoa le taunuuga o le filifiliga a le vaega faaupufai o loo tu malo, mo le faamaoniga a le Palemene. 

O le Aso Sa na te’a nei na fono ai le faafaletui o le Faatuatua i le Atua Samoa ua Tasi, sa faia ai le latou filifiliga mo le tofiga Ao o le Malo, ina ua mae’a le lima tausaga o le nofoaiga muamua a le afioga i le Tamaaiga lea sa filifilia i le tofiga i le aso 21 o Iulai o le tausaga e 2017. 

E tusa ai ma aiaiga o le Faavae ua iai nei, a mae’a le lima tausaga mulimuli pe a toe filifilia sē o loo tauaveina le tofiga, ona muta ai lea e lē toe mafai ona filifilia. 

I le faalauiloaina o le toe filifilia o le afioga i le Tama Aiga na saunoa ai le tamaitai Palemia i le Palemene. 

Le afioga i le ta’ita’i o le Malo le tamaitai Palemia le afioga Fiame Naomi Mataafa. 

Na maua foi le avanoa o le sui ta’ita’i o le Itu agai e saunoa ai ina ua mae’a ona talia ma faamaonia e le Fono Aoao Faitulafono le lafo faatū a le Malo ua toe filifilia ai le Tui Aana Tuimalealiifano i le tofiga Ao o le Malo. 

Le sui ta’ita’i o le Itu agai le tofa Lauofo Fonotoe Nuafesili Pierre Lauofo Meredith.