Ua agai le Faapotopotoga o Faaputugatupe mo le Lumanai Manuia o Samoa le NPF e tuu atu ana faamanuiaga mo ana fai saofaga mo lenei masina, o se gaioiga e faamanatu ai le 50 tausaga o le tautua a le NPF mo Samoa lea na atoa i le Aso 23 o le masina o Mati.
Talu ai ona o tapu ma vavao o loo iai le atunuu i le taimi nei o le a lē iai se faamanatuga tele peitai o ia faamanuiaga o le a patipatia ai lea matāti’a. Faailoa e le Minisita o Tupe afioga Mulipola Anarosa Ale Molioo i le feiloaiga ma Tusitala i le taeao nei aiaiga o ia faamanauiaga.
“O le tau aofai lava o le faamanuiaga lenei e tusa lea ma le $42.35 miliona, o le aofaiga lena o faamanuiaga ua maea foi ona soalaupuleina i luma o le laulau a le Komiti Faatonu aemaise foi o le Pulega a le NPF lea ua lauliliuina e faamatuu atu ai sei faailo ai foi ma faailoga ai le Iupeli Auro a le NPF”
Taua foi e Mulipola “E tolu la ni vaega tetele ua uma foi ona faataatia e le tatou pulega ma le Komiti Faatonu,
1. O le a totogi tupeina atu le NPF le 5 % faapitoa mo ana fai saofaga mo le tausaga 2022.
2. O le a totogiina atu foi e le NPF le $50 tala faapitoa mo tagata matutua faipenisione, mo le masina o Aperila, ua na’o le masina lenei o le a maua ai lea faaopoopoga.
3. O le a maua faamanuiaga tai $10,000 tala i faalapotopotoga faapitoa e 13 o lona uiga e faaalu ai se tupe e $130,000 tala. O ia faalapotopotoga e aofia ai le Toomaga mo e Puapuagatia ma le Sosaiete o le Kanesa.”
Mo faamanuiaga 5% e totogi tupe mai e le NPF mo le au fai saofaga ua faailoa e le Pule Sili Pauli Prince Shuren e muamua totogi le 3% e amata atu i le ta o le 12 i le vaeluaga o le po nanei ma le vaega atoa e faamatuu atu i le masina o Tesema. Na faamanino foi e Pauli e le’o mafai ona maua le auaunaga lea i Ofisa ona o puipuiga lava o le faamai peitai o le a amata totogi i luga o le Portal poo le system a le Pulega.
O loo fautuaina pea le au fai saofaga ina ia resitala i luga o upega tafailagi ina ia mafai ona maua a latou faamanuiaga ia.
