Ua 70 nei tausaga talu ona taunuu i Samoa le Faatuatuaga Baha’i o se tasi o tapua’iga ua faitauina i totonu o meafai a le Malo ma lo tatou atunuu, ma ua galulue faatasi foi ma isi talitonuga ma tapuaiga Kerisiano.
Ua faailoa i se tusitusiga faalauaitele a le afioga Galumalemana Steve Percival o se sui o le faatuatuaga Baha’i i Samoa, e lē gata ina atoa nei le 70 tausaga o le faatuatuaga talu ona taunuu i o tatou laufanua, ae o le tausaga lenei ua atoa ai foi le 40 tausaga talu ona tatala faitotoa e iva o le Malumalu tapuai o le faatuatuaga o loo i Tiapapata, o le maota tapuai mo atunuu o le Pasefika na faaulufale ma tatala i le tausaga e 1984 i le masina o Setema o lena tausaga.
Ua faamauina foi i tala faasolopito o lea tapuaiga o lē sa avea ma Ao Mamalu o le Malo i lea vaitau le susuga Malietoa Tanumafili II na ia tatalaina le maota tapuai, ma o ia foi le uluai Ao o se Malo na ia taliaina aoaoga o le Faatuatuaga Baha’i.
O le tausaga e 1968 na talia aloaia ai e le Tapaau Faasisina ua tuumalo le faatuatuaga.
Faaalia i le tusitusiga faalauaitele a le sui o le faatuatuaga Baha’i i Samoa o le maota tapuai i Tiapapata e iva ona faitoto’a, o se faailoga o le talia o soo se tagatanuu, lanu ma gagana ma e talia foi soo se tagata tapuai o soo se tapuaiga ma talitonuga e ulufale i le Maota tapuai o le faatuatuaga.
