E 4 ‘au a tamaitai ae 39 ‘au a alii ua faamaonia mai e le pulega o le Lakapi Samoa o le a tausinio i le vaega lona 4 o le taamilosaga lakapi taitoafitu a le Vodafone i le faaiuga o lenei vaiaso.
O le toe faaauau ai lea o le taamilosaga lenei i le mae’a mai o le vaega lona 3 sa faagasolo i Savaii.
O le vae lona 4 foi o le taamilosaga i le faaiuga o lenei vaiaso o le a taaalo ai ma ‘au a alii ma tamaitai i le vaega o i latou e i lalo o le 18 tausaga le matutua le under eighteen.
I le taamilosaga lakapi fitu i Hong Kong i le faaiuga foi o lenei vaiaso, o lea ua faailoa mai o le taaloga muamua i le vaega o pulu o le a fetaui ai le taitoafitu a le Manu Samoa ma le ‘au malosi a Niu Sila i le ‘afa o le 11 i le po o le Aso Faraile, 7 i le afiafi o le Aso Toonai o le taaloga ma Aisetalia, ma le taaloga mulimuli i le vaega o pulu o le a taaalo ai ma Hong Kong i le 10.35 i le afiafi o le Aso Toonai.
O le 3 i le vaveao o le Aso Sa le taaloga a le tatou’ au tele o le Manu Samoa ma le au a Italia ao iai le au lakapi 15 a le atunuu i lana malaga taamilo i Europa.
O le Aso Gafua le tatou taaloga ma Tonga i le taamilosaga o le Ipu a le lalolagi i le lakapi liki i le vaega o Quarter Finals. O lea taaloga o le a faia i le 3 i le vaveao o le Aso Gafua asau nei.
