Ua lē fiafia le au matamata a Sir Elton John i le tala ua sau o le a leai ni trains nanei faapea taeao.
O lea ua sau le fautuaga mai le Auckland Transport i tagata o loo fuafua e auai i le koneseti a le alii pese lauiloa e ave lau taavale poo le tui foi o le laa nanei faapea le po a taeao i le Mt Smart Stadium.
O le tapunia o le station i Penrose ona o galuega faalelei o auala o trains o loo iai nei faapea le leai o ni trains e feoai a taeao, o le mafuaaga lea.
Ua sau ai foi ma le fautuaga e pei ona tuuina mai i luga o le Facebook page a le pulega e sili lava le ave o lau taavale, ae a leai o loo iai pasi faapitoa mo le koneseti e faaaoga.
O pasi foi nei mai le taulaga e faatapulaa.
I le fesiligia ai poo fea a paka ai taavale ua fai mai le Auckland Transport o loo iai le 255 paka e aunoa ma se totogi ma e amata avanoa mai le itula e 4 nanei, ma o paka nei ua faaavanoa mai e nisi o pisinisi lata ane i le malaetaalo.
E ese mai i lea o loo iai foi le 506 pakaga maua fua o loo avanoa e aunoa ma se taimi faatapulaa i luga o le auala e mafai ona faaaoga.
Ua lē fiafia ai ma le toatele o loo faaali manatu i luga o le Facebook ona o le tala ua sau nei a le Auckland Transport ma e ui o loo ofo mai pakaga e pei ona ta’ua, ae i manatu o nisi e le lava lea pe a faatusa i le oo atu i le 40,000 tagata lea o loo faamoemoe e auai.
