Ua taunuu le mana’o o le afio’aga o Siufaga Falelatai ina ia umusa le galuega o le latou falea’oga tulagalua a o le’i toe a’e a’oga o lenei tausaga fou.
O se galuega na faaalia e se sui o le komiti na tagi i lima ina ua lē manuia sa’iliga ma talosaga na ave i faalapotopotoga ma malo e maua ai fesoasoani mo galuega tetele taugatā e pei o falea’oga.
E $540 afe le tau o le galuega ae e silia i le 300 afe tala na fesoasoani ai le poloketi o le miliona i le galuega o le falea’oga.
O le isi 200 afe ma ona tupu o le tau o le galuega na maua i le leitiofoni online ma se malaga sa’ilitupe na alu i Amerika Samoa.
E lē gata ina faafetaia e lea sui o le komiti le afioga Faalavaau Taefu Tovio Taefu le poloketi o le miliona tala a le malo ua tele lona sao i le fausia o le falea’oga, ae o le faafetai foi i tauaiga ma uo i atunuu mamao na alolofa i le sa’iliga seleni auā le fausia o le falea’oga.
Le afioga Faalavaau Taefu Tovio Taefu o se sui o le komiti o le nuu o Siufaga sa feagai ma le galuega o le falea’oga fou na umusa ma tatala aloa’ia i le Aso Tofi ua mavae, ma sa saunoa ai le afioga i le Minisita o Aoga ma Aganuu le afioga Seuula Ioane.
E iva potu o le falea’oga fou ma e mafai ona ofi ai tamaiti e 70 i le potu a’oga e tasi, e pei ona faailoa mai e le sui o le komiti le afioga Faalavaau Taefu Tovio.
O le falea’oga tuai sa tu lata i le sami peitai o popolega i suiga o le tau ua siitia ai le sami ma ua lamatia ai fanau a le nuu, o le mafua’aga lea o le siitia i uta o le nofoaga ua iai nei le falea’oga fou.
