E 3 miliona 4 selau afe tālā se vaegatupe ua faatatauina i tupe faaalu a le Matāgaluega o Puna’oa Faalenatura ma le Si’osi’omaga i le fuafuaga a le malo, o lea vaegatupe o le a totogi ai taui mo meatotino a aiga sa faaleagaina ona o le faaletonu i le auaunaga a le faalapotopotoga o le malosi tau eletise.
O le Matāgaluega o Puna’oa Faalenatura ma Si’osi’omaga e ta’ita’ifono lona Ofisa Sili o pulega i le komiti o faalavelave faafuase’i lea sa mata’itūina faatasi ai ma sui o isi matāgaluega a le malo faaletonu sa tula’i mai i le masina o Mati i le auaunaga a le eletise.
Sa faatino e lea komiti se sa’ili’iliga ma tāpā foi aiga ma pisinisi sa aafia a latou meatotino i le faaletonu o le eletise, e tuuina atu talosaga e faamatala ai poo ā meatotino e alu i le eletise sa faaletonu ona o le motusia faafuase’i o lea auaunaga tāua.
