O le foai a le malo o Iapani mo le malo Samoa e tauala atu i le Matagaluega o Leoleo, Falepuipui ma le Ola Toefuataina o le a fesoasoani lea e faatupe ai se isi vaa e lua ai vaa a le atunuu mo le puipuiga o le gataifale o Samoa.
O le vaa fou muamua lea na agalelei mai ai Ausetalia e ui na toe faafoi le Nafanua II ina ua faaleagaina ae e le’i muta ai le tuu mai pea o le tau’au fesoasoani a lea Malo latou te toe aumaia se isi vaa fou.
E 150 miliona yen le tupe sa foai atu e Iapani e tusa lea ma le 3 miliona tala Samoa. O se tasi lea o fesoasoani mai le tele o foai a le Malo o Iapani mo le Malo o Samoa talu mai la faiga faapaaga faalemalo.
O le fesoasoani la a le malo o Iapani i le taeao nei e pei ona faamanino mai e lana afioga i le Minisita o Leoleo, Faualo Lefau Harry Schuster o le a mafai ai ona faatupe ai se isi vaa mo le puipuiga o tuaoi o Samoa ae lē gata i lea e mata’itu ai le saogalemu o ogasami a le atunuu.
Ta’ua e le Amepasa o le Malo Iapani i Samoa, Senta Keisuke o lenei foai o le a saga faamausalī ai le galulue faatasi o atunuu e lua.
Na ave ai foi faamaisega a le Malo o Samoa i le Malo o Iapani ona o le tagatavaleina o lē sa avea ma Palemia o lea Malo i tausaga e tele ua tuanai ia Shinzo Abe.
